LE COSTUME NEUF D’ISSO EN JUDEO ARABE DE CHEZ NOUS, par Dawid Bnseussan

Ftrik, tselam 'ala shabo del Mellah ora bass wahdine menheum labsine kswa romiya m'a kmiza mhleula, serwal khel osbat. Kal f'aklo : «'Alass hta ana mane keuns nelbess fhalheum ? ». Kdam odaz elhaneuth delbisclyta di Baba l'Algיrien okra bisclyta bass ira kif 'amel elbass denass felblad.

Dar 'al limyne fel Plassa delmarchי 'amra benasss ofein maline elhwane kane yberho 'ala sel'a dyalheum. Daj Souk elheuth di riha dyalo mtleuka, ba'ad oossol fSok zdid. Tema kano shabo mzmeu'ine fbab el haneut, taן hdro 'ala lma'ala diataן bena'na', sgoula delwiza otyab di aflayo. Rza' bass ykemel triko tol elHdada odar 'al limine elDerb el'Attara. Houwa rghzod felkswa densara odaz lozh elhaneut di Bolhens, oqef swiyess lozh l'affiche d'cilima kbel yidkhel fDerb la'leuz.

Mnora madaz spitar, ossel elhaneut di Salom Ifergane elkheyat. Seb tema wahd errazol kaן ytfda 'ala khyalo leuzh elmraya, labess redingot khla, fido melbass el gantess bedine okabd berdo berass denkra, kane ti rwam sombrero mdouwar – sapo mneuna – ohouwa waqef belhiba olfantaziya elmedhqa lassiliya dswiriyine.

Mdira dak linglizi, hbi ykherz fhalo melhaneut. Behq sahbo Salom ma khelahs yidzbad. Mhit salom 'arf tkhmima disahbo, qal : « Bessimane tob omzaltob ! Tiq biya, 'amork matendem, na'melk kswa dseltane elkbar ! ».

Isso tghewa osalom bda yqbed l'a'bar : el'ank, elhzem, tissa'… « Wah wah kif had elmoda wa'ra !» kal Isso f'aklo. Salom kal l'Isso bass yirza' mnora zem'a bass iqiyess elkswa.

Isso khba elhkaya 'ala mrato oma'awdelhass walo. Ozem'a dazt 'ala Isso belhem elkbir orza. Felkher, ossel enhar dikayetsena. Salom kane mozeud oferh bih oqblo belbrakha di barokh haba.

Isso bda belbass diqemza bida ot'azeb 'ala la'qayd elqlal difiha, massi fhal walf tilbess elkftane taן oussolo hta l'ank, 'amar belqayd elmdiyek. Mnora dak, ossel neuba dserwal.

– Hadi hseuma kal Isso okeyn'at belbragitta

– La ! hadi pratik ! kallo Salom

Isso hez rasso, qaytir fsma mdiqiyess elvesta. Ma'akels rasso. Kane ma'zer.

– B'issk hdenn rask. Ila tbka mkemess, hta sikswa matzi 'alik !
Zat neuba dsombrero dibogar.
– Ass na'mel bhad sapo, kal Isso. Sessia tqdini !
– La la, kal Salom, hdaz sapo basyselmo 'ala nass. Ossralo kif isselmo bsapo bswab.
Isso tsena zem'a okhra belhem ktir orza. Kelbo mherrek, Isso izeb elkswa.
– Daba loqt bass enkhmemo flesaccessoires kal Salom.
– Ass hadi ? Baqi massalina ? sqsa Isso
– Enbdawe blesbaleines
– Nsri lbaline ? 'Alass za loqt delmassyah difass naklo se'ouda deliviatane ?
– La ! qallo Salom, odkhel lbaline felkoyyar del kemza. Daba nzido nkhmemo bla'aqad del manos.
– Wass ana mhbouss ? Wass melfelta 'amelt ?
– Nahat rouwah akhaן ! 'Amri marit wahed dimfqa' mel l'יlיgance !
– Isso kherz sbat dimsa sra 'and Sem'one Azinkot felHdada. OSalom za m'a elgrabatta.
– Bar minane ! hti t'alkni ?
– Hatati 'awiti passa'ti ! ass 'amelt ellah la'ziz bass ykeune 'andi kliene wa'er fhalk ! Ntina dandy dla City qal lo Salom b'ein diqat tenza fih. B'isk, doz 'and Sema'ya elbarberos fel rass derb bass yigerdelk dik elhya wiya'melk la coupe fhal elweld dcilima.

Melbass omhdek fhad eraht, Isso maz'ams itkheul fdar. Tla' Derb La'leuz, dar 'al lissar fDerb du Consulat di Franssa hta ossel Derb Coutolle. Menhnak msa lPlassa di Chayla dihiya Sanezilizi dSwira. Houwa taן lali wiyssouf hnak, tetpassiar enass labsine kswa romiya, olmrawat dilabsine krinoline, siihoud labsine ellbass dlingliz, la'sker elfranssess m'a elkswa tatsta', ossi nass m'a lsapo dikanotyי. Msa orza' halokh wassoub orza' mDerb elKsba bass ydeuz 'ala elMdina omtemma idkhel elMellah.

Si nass safo bih : Si nass keyraho wit'azbo fih, ossinass keyraho widhso fih. Daz felmdina ou hess belghzra di taןghzro fih enass okhella menora Hayim Zgor oNsim Elkelaן femhom mter'a mqtar didhsa didahso fih. Daz elferrane di'Abibo oossel fTer'a. Kane tikhemmem f'aklo kif yiqbleuh nass di kaן 'arfoh. Tkhel fThtsaba mdelma, omaz'ams itkhel elMellah di 'amar belnass. dar lissar omsa 'and sahbo Yossif Lugassy souwaye.

– Aye aye aye ! qal Yossif. wass hdaz nserbiwe dak elfromaz elkhanz delfrancess ? Hti sopa mtbokha bsrab ? Wass mazi tbqa sahbna ? Hak had sandwich delkfta mdkhna obsahtek !
Isso thzem odkhal felMellah.
– Makane fhems kal lo Ishaq Swissa dikaye ba' elmahya. Mayssi Pourim elyeum bass khfti rask. Hiya ghdertini osriti mahya sihdakhor!
– La, la, matbdelts akhaן !
Isso kemel triko oberhlo Nsim Sandillon.
– Daba tbda t'iss belbagetta d'af otkeune snob omaterdass belkhebz dyali ?
Nass daro bih, wiqzmo widelko 'ala ktfo. Felkher, Isso dkhel felDerb Hastibi fein sakn otla' eldaro dinit dar Mossי Tapa.
– 'Aqdo roh ! 'Aqdo roh ! Razli hbel ! bdat siyah Izza.
– Yallah Izza ! Riyyeh khaterk ozib si mahya na'mlo tsin-tsin bass enbarko had sa'a.
Izza ma sabt raha obqat dor mnorah fhal sikelb taןkeune izri 'ala dnabo.
– Gels ellard, ya Izza. Kbel manserb, enhbek thel had elpakit.
– Mhmeuma, Izza helt elpakit orat mesmom denwar mkhbod 'ala sapo delmobar khdar.
– As had zardine hada ?
Isso kbed elsapo disra 'and Madam Zagury felPlassa di Chayla, olbso elmrato.
– Wass tarek la'qel ? Hsebti rassi fhal sanya bastheret fiha ?